АЛА ҚАРҒА (Corvus cornix) — торғайлар отрядының қарға тұқымдасына жататын кұс. Қазақстанда кең тараған. Дене тұрқы 47 — 50 см, салм. 0,6 кг болады. А. қ-ның басы, қанаты, құйрығы қара, ал арқасы мен бауыры сұрғылт, тұмсығы үшкір, тырнақтары өткір. Орман шетіндегі, өзен бойындағы тоғайларға, бақтарға, кейде дара өскен ағаш басына ұя салады. Мекиені 4 — 7 қызыл коңыр, секпілді көгілдір жұмыртқаны 19 күн басады. Балапандарын кезектесіп 35 күндей ұяда, негізінен, жәндіктермен асырайды. Тамызда балапандары ұядан ұшады. Ересегі қорек талғамайды. Қазан айында Тянь-Шань тауының етегіне, қыстауға ұшып кетеді. А. қ. пайдалы құстардың жұмыртқасын зақымдап зиян келтіреді.