АҚ ЖУСАН (Artemisia lercheana) — күрделі гүлділер тұқымдасына жататын, жусан туысының бір түрі; көп жылдық шөптесін өсімдік. Қазақстанның Ақтөбе, Атырау, Батыс Қазақстан, Қостанай, Қарағанды, Алматы обл-тарындағы шөлді және дала аймақтарының құмайт, құмды және сортаң топырақты жерлерінде, кейде ескі егістік алқаптарда өседі. Биікт. 18 — 45 см, сабағы мен жапырақтарын ұйысқан қалың бозғылт сұр түк басқан. Тамыры жуан, сүректі келеді. Сабағы бұтақты, жоғарғы жағындағы жапырағы сағақты, орта шетіндегілері сағақсыз қауырсын тәрізденіп 2 — 3 рет тілімделген. Гүлі қос жынысты, күлтесі сары, не қызғылт түсті. Гүл шоғында 2 — 3 гүл болады. Тамыз — қазан айларында гүлдейді. А. ж. — қорегі мол, малды тез семіртетін күздік және қыстық жайылымдық шөп.