АККРЕДИТИВ (лат. Accreditivus – сенімділік) — 1) банк есебінің бір түрі. Төлеушінің тапсырмасы бойынша банкте ашылады. Қолма-қол ақшасыз есептеудің түрі ретінде А. халықар. коммерц. операциялар бойынша есеп айырысуға және ұйымдар арасындағы төлемдерді жүзеге асыруға қолданылады; 2) жеке тұлғаның банктен ақша алу құқығын растайтын бағалы қағаз. Бұл жағдайда А-те ақша алушының аты-жөні мен берілетін ақшаның мөлшері анық көрсетіледі. Есеп айырысу жөніндегі банктер арасындағы келісімдерге сәйкес А-те көрсетілген ақшаны тиісті банк қолма-қол төлеуге міндетті. А. түрлері: ақша және тауар түрінде болады. Ақша түріндегі А-ті қызмет бабымен, саяхатқа шетелге шыққан, не ел ішінде жүрген адамдар кеңінен пайдаланады. Тауарлық А. негізінде халықар. саудадан сатып алушы мен тауар жеткізушінің арасында есеп жүргізгенде қолданылады.