АЙТБАКИН Әміре Дүрманұлы (1861, бұрынғы Семей обл. Павлодар у. Ақбеттау болысы — 1919, Өскемен) — алғашқы қазақ дәрігерлерінің бірі. Баянауыл өңіріндегі Айтбақы байдың отбасында дүниеге келген. А-ның екі ағасы — Темірғали мен Омар Омбы кадет корпусын, Ресей армиясының Бас штабы жанындағы әскери академияны және әскери-инж. уч-щені бітірген. А. 1882 ж. Омбы мұғалімдер семинариясын аяқтағаннан кейін осы қаладағы гимназияда сабақ берді. 1883 — 89 ж. Дала ген.-губернаторының, Семей обл. әскери губернаторының тілмашы, Қарқаралы у. бастығының көмекшісі, Семей обл. әскери губернаторы кеңесінде айрықша тапсырмалар жөніндегі шенеунік болды. 1885 ж. мамыр айында ол Шар өз. бойындағы Қарамолада 5 уездің билері мен ел жақсылары талқылаған “Семей қазақтары үшін қылмысты істерге қарсы заң ережелерін” жазуға қатысты. 1889 — 94 ж. Томск ун-тінің мед. ф-тін бітірді. Қарқаралы және Павлодар уездерінде дәрігер, 1898 жылдан бастап Өскемен уезі Большенарым кентінде учаскелік дәрігер болды. 1902 ж. ол Қарқаралыдағы Құнанбай мешітінің имамы Ғұбайдолла Бекметов қажының қызы Махфузаға (1888 — 1956, Баку) үйленді. А. Қазан төңкерісіне дейін Өскемен уезінің Зайсан мен Қатынқарағай аралығындағы ауылдарда дәрігерлік қызмет атқарды. Төңкеріс жылдарында жергілікті кеңестің төрағасы, Өскемен уездік кеңесі атқару комитетінің мүшесі болды, уездік земство басқармасында қызмет етті.