Талаптың пайдасы

Талаптың пайдасы

Ы. Алтынсарин

Петр Великий деген осы күнгі ақ патшамыздың бабасы бір күні намаз оқып тұрғанда, көп адамның арт жағында үңіліп патшаға қарап, бөркімен қалқалап қана бір нәрсені сызып тұрған балаға көзі түседі. Мұнымен бөтен кісінің ісі жоқ, жалғыз-ақ ақылы кемел патша сол бала-екеш балаға да көзін салып тұрған екен. Намаз оқып болған соң, жұрт екі жарылып патшаға жол беріпті; сонда патша тұп-тура манағы балаға барады. Бала қолындағы сызуымен болып тұрып, тіпті, патшаның қасына келгенін де байқамай қалыпты. Сонда жұмсақ шыраймен патша сұрады:
− Не қылып тұрсың?
−Сенің жүзіңді жазып алайын деп едім.
− Оны не қыласың?
−Даңқың, дабылың жер жүзіне жайылған, патшам! Сенің суретіңді сызып алып, өміріме шейін бойымда сақтайын деп едім.
− Кәні, көрсетші сызғаныңды.
Сол уақытқа шейін қорықпай жауап беріп тұрған бала «сызғаныңды көрсет» дегенде, қысылайын депті: сөйтсе де сызған қағазын әдеппен патшаның қолына берді. Қараса, сурет реуішті де емес, әйтеуір өз білімінше сызған сызық, бала ол күнде сурет салуды қайдан білсін. Солай да болса, әлемге ақылы жеткен патша баланың талапты, зерек екенін аңғарып, оқуға бергізіп, ақырында сол бала бүтін орыс жұртына даңқы шыққан Матвеев деген суретші болған.

Добавить комментарий

Ваш адрес email не будет опубликован. Обязательные поля помечены *