Жастығым сені жоғалттым,
Қалың орман ішінде.
Жүзіндей сом болаттың
Жарқ етесің түсімде.
Бұрынғыша екеуміз,
Орман кезіп кетеміз.
Тал бүршігін сындырып,
Шапқылаймыз жүгіріп.
Сен кетесің шарқ ұрып,
Мен қаламын алқынып.
Жастығым сені жоғалттым,
Дарияның төсінде.
Жүзіндей сом болаттың
Жарқ етесің түсімде.
Бұрынғыша екеуміз
Сыр жағалап кетеміз.
Су тамаша, су қызық –
Шалқалаймыз бір жүзіп.
Сен кетесің алыстап,
Мен қаламын тал ұстап.
Сырбай Мәуленов