Қан майданнан хат салып ем,
Қайта келді оралып.
Жаным үсіп, жапырағым түсіп,
Қалды жүрек тоналып.
Ешкім ашып оқымапты,
Жазып ем сыр он бетке.
«Жоқ» деп сені әлде біреу
Қол қойыпты конвертке.
Бар шығарсың бұл дүниеде
Жоқ шығарсың мен үшін.
Олай болса құтты болсын
Жаңа тапқан өрісің.
Келем майдан қақ төрінде
Кеуде тосып мың оққа.
Мың бірінші оқ аттың сен
Жығылмаспын бір оққа.
Сырбай Мәуленов