АЛМАТЫ ПОРШЕНЬ ЗАУЫТЫ — Алматы қ-ндағы машиналар мен механизмдердің поршень бөлшектерін шығаратын кәсіпорын. Ол 1944 ж. әр түрлі мех. шеберханалардың негізінде құю-механикалық зауыты ретінде құрылды. Зауыт бастапқы кезде таразылар, пневматик. балғалар, вагон-үйлер, әр түрлі темір бөлшектер шығарып келді. 1959 ж. зауыт қайта жаңғыртылып, поршень бөлшектерін шығаруға мамандандырылды. 1974 ж. Алматы поршень зауыты деп аталды. 1994 ж. Алматы поршень зауыты акцион. қоғамы болып қайта құрылды. Кәсіпорын өз өнімдерін Ресей, Түрікменстан, Қырғызстан, Тәжікстан, Өзбекстан елдеріне де жөнелтеді.